Xabaal Wadareedyo Laga Helay Xadka U Dhaxeeya Soomaalida iyo Oromada
November 9, 2018 - Written by admin

Booliiska dalka Itoobiya ayaa sheegay in ay heleen xabaal wadareed ay ku jiraan labo boqol oo may, taas oo ku taalla xadka u dhaxeeya Oromada iyo deegaanka Soomaalida.

Boqollaal kun oo ruux ayaa ka barakacay rabshado horay uga dhacay halkaas.

Warbaahinta gudaha ayaa ku warrantay in xabaasha la helay intii la waday tacaddiyo lagu eedeeyay in uu gaystay madaxweynihii hore ee Dawlad Deegaanka Soomaalida Itoobiya.

Cabdi ayaa hadda ka war sugaya maxkamad qaadaysa dacwaddiisa isaga oo ku eedaysan in uu huriyay iskudhac qawmiyadeed.

Booliiska gacanta kulul ee Liyuu Booliiska loo yaqaanno ayaa lagu eedeeyay in ay gaysteen dilalkaas ka dhacay inta u dhaxaysa Oromada iyo Soomaalida dalka Itoobiya, waxayna lagu soo warramayaa in ay si toos ah uga amar qaadan jireen madaxweynaha.

Booliiska ayaa isku dayaya in ay aqoonsadaan 200 ee mayd.

Cabdi Maxamuud ayaa bishii Agoosto lagu qasbay in uu is casilo, toddobaad ka dibna xabsi ayaa la dhigay, ka dib markii ay rabshado ka dhaceen caasimadda gobolka ee Jigjiga.

Waxaa lagu eedeeyay in uu ku luglahaa xadgudubyo baahsan oo aadanaha ka dhan ah kuwaas oo ay ka mid yihiin jir dil, kufsi iyo dil dhacay muddadii 13 sano ahayd ee uu xilka hayay.

Source: bbcsomali

COMMENTS
Latest News