Waa wiil aad u da’ yar, wax bartay, laakiinse halbeegii noloshu ka qalloocatay. Waxa saamayn ku yeeshay siyaasi beenaale ah oo ku guura iyo suldaan hungurigu hago. Kuwaas ayaa kolba midi dhan u jeediyaa, jaamacaddii uu soo bartayna waxa ay noqotay mid uu aqoonteedii ku agaasimo shir beeleedyo aan kheyr wadin. Imika uun buu baraarugay, waxaanu ku tiraabay intan:
Nacas aan dantii garan
…………………………..
Afka waxaan ka sheegaa Waxaan uurku ila qabin Af-gobaadsi mooyee Runta maba abaaroo Been baan afuufaa Eexdiyo qabiilkana Anigaa abqaaloo
Gole reerka ururshiyo
Ardaa aan ka baaniyo Ururraanu leenahay Iyo dhawr ardaayoo Ay ujeeddadooduba Tahay arami baas iyo Naxligoon abuurniyo Ehelkoo la kala diro. Aayahayga waxa haga Afmiishaar danaysta ah Aqoontiyo tacliintiyo Ogaalkiyo xogtaan helay Caqli iguma biirshaan Alle doori baan ahay Aan aqoon dantiisoo Halkii uu ku jabay waa Mar labaad ag jiifoo Isagoo halbowluhu Eegga dhiigga habayoo Hilbihiisu eydiyo
Cadow ay u dagan yiin Isla weyni hodaysoo Axmaq aan xishoon iyo Waxaan ahay agaan falan Oo Carab is moodoo
Intuu tiisa quudhsado Afrikana iskala weyn
Diintiyo islaanimo Afkuun baan ka sheegtaa Ulajeedka noloshiyo
Wixii uu Ilaah faray Addoon beeniyaan ahay Masjidkoo la aadiyo Eedaankiyo salaaddana Anigowgu badiyoo Addinkoon dhammaan baan Safka hore abbaaraa Axaadiista diintiyo Ereygii Rasuulkiyo ( csw) Wuxuu Eebbe yidhi fala Annaa beenshay waa hore
Astaan waxaan u leeyahay Af xumaanta faafshiyo Maskax owdan oon dhalin Hal-abuur i deeqiyo Erey qudhoo samaha dhiga
Ruux asqaysan baan ahay
Is og oo haddana moog
Doqonkaan adeecaa
Beenaale iyo tuug
Midka aaminaan ahay
Ninka aniga oo nool
Ahmin iyo sidii awr
Aayahaygii iibshee
Axakankaygii cunay baan
Intaan taash u tolo weyn
Aqal laba daryaale ah
Oo dadweyne leeyahay
Gabadh ugu aroosaa
Waxaan doono ma aqaan
Waxaan diido lama arag
Ulajeedka noloshana
Dhegahaan ka awtoo
Indho samaha neceboo
Xumo jecel ayaa i dilay
Asaagay i dhaafyoo
Alla doori baanee
Eebboow i samabixi
Idilkiin dadkaygoow
Rabbi hay i jaabee
Aammiin ducada dhaha
Muuse M. Ciise ( Dalmar)
musa.m.isse@hotmail.com
2015-09-22
Sweden
