Dadkaygoow dalkaygoow
Damacayga madaxnimo
Dalka inaan hoggaanshaa
Dadka inaan u taliyaa
Daaro inaan ka seestiyo
Inaan doolar ka hantiyo
Inaan qolo durduurshiyo
Dano gaara kama lihi
Iyo xukun diktaytara
Dadkaygoow dalkaygoow
Damacayga madaxnimo
Dalka inaan hoggaamiyo
Waxan uga dan leeyahay
Inaan Daa’im la cuskado
Danta guud inaan tolo
Isku dayo dal iyo dibad
Dadka waxan u qaban laa
Dumarkiyo carruurtiyo
Da’yartiyo iyo agoomaha
Aan daryeel u sara kaco
Oy daacad iga tahay
Haddii Daa’imku aqbalo
Dadkaygoow dalkaygoow
Damacayga madaxnimo
Dalka inaan hoggaamiyo
Waxan uga dan leeyahay
Darajada aqoontiyo
Diblamaasinimadiyo
Khibradayda duugga ah
Dalka inaan hore u wado
Ilaahay ha daaye
Duco qabo walaalkay
Halkuu maanta daajiyay
Inaan daaqsiin kale furo
Dardargeliyo hawlaha
Khayraadka dihiniyo
Nimco kuu daboollayd
Inaan dawyo badan furo
Danta guud u hagar baxo
Dadkaygoow dalkaygoow
Damacayga madaxnimo
Dalka inaan hoggaamiyo
Waxan uga dan leeyahay
Diblomaasi baan ahay
Dawladaha Midoobiyo
Duwalka Afrikaadiyo
Dunidaba dhammaanteed
Nin la doodayaan ahay
Oon daah ka saarrayn
Dulucdaydu waxay tahay
Doonisteennaa qaranimo
Halkay daarantahay talo
Ka dalbado aqoonsiga
Doorka u horreeyaba
Isagoo dardaro qaba
Ictiraafki soo dego
Dadkaygoow dalkaygoow
Maxaan daalacanayaa
Dalka horumarkiisiyo
Daabbadii aqoonsiga
Dariiqaan u marilaa
Immikaan ku daba jiray
Anoo duubka qaatana
Wuu ka soo degdegi laa
Dadkaygoow dalkaygoow
Damacayga madaxnimo
Hoggaan daacadaan ahay
Dalkaan kala aqaannaa
Dadkaan wada aqaannaa
Dugsiyada aqoontiyo
Duruustaan u bixin jiray
Da’yartaan wax soo baray
Maantaana daryeelkood
Daacad baan u wada ahay
Diriraha sokeeyiyo
Dadka kala gurkiisiyo
Dulmigiyo iyo qabiilkiyo
Dirka xukun diktaytar ah
Ninka diidan baan ahay
Midnimada danteediyo
Dalka wada jirkiisiyo
Isku duubnideenniyo
Doonista ictiraafkiyo
Sumcadeenna dibadaba
Dalkaygoow dadkaygoow
Shirka loo doceeyay
Haddii laygu doortiyo
Haddii lay duceeyaba hooggaan daacadaan ahay
Maansadi waa dareenkayga aan ku taageerayo Musharax Maxamed Biixi Yoonis
Muna Cabdillaahi
Burco, Somaliland
21kii October 2015
